Ema Koci

Ema Koçi mban pozicionin e Drejtoreshës së Drejtorisë së Jetësimit të Prioriteteve dhe Statistikave pranë Ministrisë së Turizmit, Kulturës dhe Sportit, që prej korrikut 2026.

Në detyrën e saj aktuale, ajo drejton dhe koordinon punën për ndjekjen e prioriteteve të Ministrisë, monitorimin e objektivave dhe analizimin e të dhënave statistikore në fushat e turizmit, kulturës, sportit dhe rinisë. Pjesë e përgjegjësive të saj është edhe bashkëpunimi me strukturat e Ministrisë dhe institucionet e varësisë për mbledhjen, përpunimin dhe raportimin e informacionit, si dhe për vlerësimin e ecurisë së programeve dhe projekteve sektoriale.

Në këtë kuadër, puna e saj përqendrohet në përmirësimin e mënyrës së administrimit dhe analizimit të të dhënave, ndjekjen e treguesve të performancës dhe identifikimin e çështjeve që kërkojnë vëmendje apo ndërhyrje. Një rëndësi të veçantë i kushton përdorimit të informacionit statistikor në proceset e planifikimit, monitorimit dhe vendimmarrjes institucionale.

Përpara marrjes së kësaj detyre, ka qenë Këshilltare pranë Ministrisë së Turizmit, Kulturës dhe Sportit, ku është angazhuar kryesisht në nisma që lidhen me inovacionin dhe transformimin digjital. Më herët ka ushtruar funksionin e Këshilltares së Drejtorit të Përgjithshëm të Entit Kombëtar të Banesave.

Gjatë periudhës 2019–2024, ka drejtuar Njësinë e Platformave dhe Shërbimeve Digjitale pranë Drejtorisë së Përgjithshme të Shërbimeve të Transportit Rrugor (DPSHTRR). Në këtë pozicion ka qenë përgjegjëse për menaxhimin dhe koordinimin e projekteve të digjitalizimit, zhvillimin e platformave elektronike dhe përmirësimin e proceseve të ofrimit të shërbimeve publike. Kjo përvojë ka përfshirë planifikimin e projekteve, koordinimin e strukturave të përfshira në zbatimin e tyre dhe ndjekjen e rezultateve.

Përvoja e saj profesionale përfshin gjithashtu detyra në fushën e komunikimit dhe informimit publik pranë Agjencisë së Parqeve dhe Rekreacionit të Bashkisë Tiranë, si dhe angazhim në sektorin privat në fushën e marketingut digjital dhe analizës së performancës.

Ema Koçi ka përfunduar studimet Master Shkencor në Inxhinieri Ekonomike pranë Universitetit Politeknik të Tiranës, si dhe Master Shkencor në Komunikim Institucional dhe Biznesi pranë Università degli Studi di Perugia, Itali me vlerësimin maksimal akademik. Gjithashtu, është diplomuar në nivelin Bachelor në Teknikë Publicitare pranë Università per Stranieri di Perugia.